Azərbaycan Fransa Senatında ölkəmizə qarşı qəbul edilmiş qətnamə ilə bağlı etiraz notası təqdim edib. Bu barədə noyabrın 16-da Xarici İşlər Nazirliyi məlumat yayıb.
Fransanın müvəqqəti işlər vəkili JüLyen Lö Lan XİN-ə çağırılıb. Görüşdə tamamilə həqiqətdən uzaq, yalan və iftira dolu müddəaların əks olunduğu qətnamənin Azərbaycan tərəfindən rədd edildiyi diqqətə çatdırılıb.
Eyni zamanda bu sənədin açıq təxribat xarakteri daşıdığı və Fransanın ermənipərəst və birtərəfli mövqeyini nümayiş etdirdiyi bildirilib. Fransanın bu addımının Azərbaycanla Ermənistan arasında münasibətlərin normallaşmasına ciddi zərbə vurmaq məqsədi daşıdığı vurğulanıb.
“Qətnamə beynəlxalq hüququn norma və prinsiplərini kobud şəkildə pozmaqla yanaşı, Azərbaycanla Fransa arasında “Dostluq, qarşılıqlı anlaşma və əməkdaşlıq haqqında Müqavilə”nin (1993) çərçivəsində öhdəliklərə tamamilə ziddir”, - deyə qurumun məlumatında qeyd edilib.
Xatırladaq ki, noyabrın 15-i Fransa Senatında ölkəmizə qarşı qətnamə layihəsi müzakirəyə çıxarılıb. Səsvermə nəticəsində 295 nəfər qətnamənin lehinə, 1 nəfər isə əleyhinə səs verib.
Qətnamədə Fransanın və digər Avropa İttifaqı ölkələrinin “Azərbaycandan idxal edilən qaz və neftə embarqo tətbiq etmək” çağırışı yer alıb.
