Azərbaycan İrəvanda bayrağımızı yandıran ermənini beynəlxalq axtarışa verib. Bu barədə 20 aprel tarixində Baş Prokurorluq məlumat verib.
Bildirilib ki, aprelin 14-də Ermənistanın paytaxtı İrəvanda keçirilən Ağır atletika üzrə Avropa çempionatının açılış mərasimində mediadan istifadə olunmaqla milli nifrət və düşmənçiliyin salınmasına yönəlmiş nümayişkəranə hərəkətlərlə Dövlət Bayrağımızın yandırılması faktı üzrə Azərbaycanın Baş prokuroru tərəfindən cinayət işi başlamışdır.
İbtidai istintaqla “Ermənistan İctimai Televiziyası”nın Dizayn studiyasının rəhbəri işləmiş, 28 sentyabr 1982-ci ildə Ermənistanın İrəvan şəhərində anadan olan və həmin dövlətin vətəndaşı olan Nikolyan Aram Vrejinin milli düşmənçilik zəminində Azərbaycana qarşı cinayətlər törətmək məqsədilə hazırda şəxsiyyətləri istintaqla araşdırılan bir qrup şəxslə birləşərək qeyd olunan tədbirdə geniş beynəlxalq auditoriya qarşısında nümayişkəranə şəkildə Dövlət Bayrağımızı qəsdən yandırıb.
Belə ki, Aram Nikolyan aprelin 19-da İnterpol xətti ilə beynəlxalq axtarışa verilib.
Baş Prokurorluq tərəfindən xarici dövlətlərin hüquq-mühafizə orqanlarına müraciətlər göndərilərək Aram Nikolyan barəsində zəruri istintaq hərəkətlərinin keçirilməsi və dövlət sərhədini keçdiyi halda saxlanılaraq Azərbaycana ekstradisiya olunması xahiş edilib.
“Azərbaycan və onun vətəndaşlarına qarşı milli nifrət və düşmənçiliyin beynəlxalq müstəvidə bir daha ifşa edilməsi, eləcə də təqsirkar şəxslərin milli və beynəlxalq hüquq normaları çərçivəsində məsuliyyətə cəlb edilmələri istiqamətində Azərbaycanın Baş Prokurorluğu tərəfindən kompleks tədbirlərin görülməsi davam etdirilir”, - məlumatda qeyd olunub.
