Azərbaycan Prezidenti İlham Əliyev Ərdoğana başsağlığı verdi. Bu barədə 6 fevral tarixində Prezidentin Mətbuat Xidməti məlumat verib.
Prezidentin tapşırığı ilə FHN-nin 370 nəfərlik heyəti Türkiyəyə göndərilir.
“Kahramanmaraşda baş vermiş və qardaş Türkiyənin bir çox yerlərində hiss edilmiş güclü zəlzələ nəticəsində çoxsaylı insan tələfatı və dağıntılar barədə xəbər bizi olduqca kədərləndirdi.
Bu ağır məqamda hər cür yardım göstərməyə hazır olduğumuzu bildirir, faciə ilə əlaqədar Sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyir, zəlzələnin nəticələrinin tezliklə aradan qaldırılmasını arzulayıram.
Allah rəhmət eləsin!”, - məlumatda bildirilib.
