Azərbaycanın bölgələrində mal və quzu əti bahalaşıb. Bu barədə Trend 20 fevral tarixində məlumat verib.
İsmayıllıda və Şamaxıda ət satışı ilə məşğul olan satıcılar ətin qiymətində 2 manat artım olduğunu bildiriblər.
Onların sözlərinə görə, bir həftədir ki, bazarda quzu ətinin qiyməti 14 manatdan 15 manata, mal ətinin qiyməti isə 11 manatdan 13 manata qalxıb.
"Budəfəki qiymət artımı mövsümi deyil. Əsas səbəb diri çəkidə alınan mal-qaranın baha olmasıdır", - deyə satıcılar qeyd ediblər.
Bənzər mənzərə Ağsu və Göyçayda da müşahidə olunur. Satıcılar ətin bahalaşmasını ot və yemlə əlaqələndirsələr də, bəziləri hazırda ətlik mal-qaranın azlığını səbəb göstərirlər.
Satıcıların sözlərinə görə, qiymət artımı alış qabiliyyətinin azalmasına səbəb olub.
