Azərbaycanda üç bələdiyyə sədrinə cinayət işi açılıb. Bu barədə 15 fevral tarixində Report məlumat verib.
Masallı rayonu Təzəkənd bələdiyyəsinin sədri tərəfindən bələdiyyə iclasında qərar qəbul edilmədən, müvafiq icra hakimiyyəti orqanının rəyləri olmadan, hərrac və müsabiqədən kənar qaydada 44 ha torpaq sahəsinin qanunsuz olaraq ayrı-ayrı şəxslərin icarəsinə ayrılması faktları üzrə Cinayət Məcəllənin “vəzifə səlahiyyətlərini aşma” və 313-cü maddələri ilə cinayət işi başlanılıb.
Bundan əlavə, Zərdab rayonu Dəkkəoba bələdiyyəsinin sədri tərəfindən bələdiyyə iclasında qərar qəbul edilmədən hərrac və ya müsabiqədən kənar qaydada bələdiyyə mülkiyyətinə aid 28 ha torpaq sahəsinin real dəyərindən aşağı qiymətə icarəyə ayrılması faktı üzrə Zərdab rayon prokurorluğunda Cinayət Məcəllənin “mənimsəmə və ya israf etmə”, “rüşvət vermə” və 313-cü maddələri ilə cinayət işi başlanılıb.
Həmçinin Göygöl rayonu Hacıməlik bələdiyyəsinin sədri tərəfindən kollegiallıq prinsipinə zidd olaraq, təkbaşına qərar qəbul edilərək 9,48 ha torpaq sahəsinin icarəyə verilməsi barədə saxta iclas protokollarının və qərarların tərtib edilməsi faktı üzrə Cinayət Məcəllənin 308.1-ci və 313-cü maddələri ilə cinayət işi başlanılıb.
