Azərbaycanda uşaqlar arasında yayılan virus infeksiyalarının adı açıqlanıb. Bununla bağlı açıqlamanı Elmi-Tədqiqat Pediatriya İnstitutunun (OMD) baş həkimi Azər Əhmədov verib.
Bu barədə 17 fevral tarixində Report məlumat verib.
Həkimin sözlərinə görə, əvvəlki illərlə müqayisədə ötən ilin noyabr ayından sanki xəstə sayında artım müşahidə edilib: “İlk dövrlərdə uşaqlar arasında respirator sinsitial virus dediyimiz infeksiya çoxluq təşkil edirdi. Bunu daha sonra qrip kimi tanıdığımız “İnfluenza” virusu əvəzlədi. Daha sonra az sayda adenavirus, Epstein-Barr virusu (EBV) görsək də, daha çox bakterial infeksiyaların A qrupundan olan Beta hemotilik streptokok dediyimiz boğaz infeksiyası yayıldı”.
“Bu, 5 yaşdan yuxarı uşaqlarda daha təhlükəli fəsadlara yol aça bilir. Bu fəsadlara ciddi revmatizm, ürək zəifliyi aiddir. Hazırda həmin infeksiyalara az-az da olsa, rast gəlinir. Lakin yoluxma hallarının azalmasını müşahidə edirik. Bu da təbiidir. Çünki payız-qış mövsümünün bitməsinə yaxınlaşırıq”, - deyə Azər Əhmədov əlavə edib.
