7 fevral 2013-cü ildə (Bakı vaxtı ilə 8 fevral saat 01:36) Azərbaycanın ilk telekommunikasiya peyki olan “Azerspace-1” (Africasat-1a) Fransız Qvianasının (Cənubi Amerika) Kuru kosmodromundan orbitə buraxılıb.
Bu peykin çəkisi 3275 kq, istismar müddəti isə 15 ildir. Peyk ABŞ-nin “Orbital Sciences” korporasiyası tərəfindən istehsal edilib. Deyilənlərə görə, “Azerspace-1”in ərsəyə gəlməsi üçün 230 milyon manat xərc çəkilib. Bu məbləğin 15%-i dövlət büdcəsindən, qalanı kreditlərlə ödənilib.
“Azerspace-1” peyki ilə 1296 rəqəmsal TV kanalı yayımlana bilər. Lakin hazırda peyk üzərindən Azərbaycan, türk, rus, ingilis və digər dillərdə, yerli və beynəlxalq səviyyəli 100-dən çox televiziya və radio kanalı yayımlanır. Bundan əlavə, “Azerspace-1” peyki respublika əhəmiyyətli kanallarla yanaşı, regional kanallar üçün də dünya yayımına çıxış imkanı yaradır. “Azerspace-1” peyki Afrika, Avropa, Mərkəzi Asiya və Yaxın Şərqdə 50-dən artıq ölkəni birləşdirən ortaq məkanda mühüm informasiya ötürücüsü funksiyasını yerinə yetirir.
Rabitə peykinə nəzarət hüququ Cənubi Qafqazda ilk peyk operatoru olan Azərkosmos Açıq Səhmdar Cəmiyyətinə məxsusdur. Azərkosmosun əsas Yerüstü Peyk İdarəetmə Mərkəzi Abşeronda, ehtiyat Yerüstü Peyk İdarəetmə Mərkəzi isə Naxçıvan Muxtar Respublikasının Culfa rayonunun Nəhəcir ərazisində yerləşir.
Bundan əlavə, Azərbaycan orbitə “Azersky” müşahidə peyki və “Azerspace-2” peyklərini də buraxıb.
