Bakıda doqquzmərtəbəli yaşayış binasında yanğın olub. Bu barədə 12 aprel tarixində Fövqəladə Hallar Nazirliyi məlumat verib.
Bu gün günorta saatlarında nazirliyin “112” qaynar telefon xəttinə Bakı şəhərinin Xətai rayonu ərazisində yerləşən çoxmərtəbəli yaşayış binasında yanğın baş verməsi barədə məlumat daxil olub.
Hadisə yerində əməliyyat şəraiti qiymətləndirilərkən yanğının doqquzmərtəbəli yaşayış binasının 3-cü mərtəbəsində yerləşən ikiotaqlı mənzildə baş verdiyi və mənzildə bir nəfər vətəndaşın həyati təhlükəli vəziyyətdə qaldığı müəyyən edilib.
FHN qüvvələri tərəfindən operativ qaydada yanğın baş verən mənzilin qapısı xüsusi vasitələrlə açılaraq yanğın qısa müddətdə söndürülüb və mənzildə həyati təhlükəli vəziyyətdə qalan vətəndaş xilas olunaraq təcili tibbi yardım briqadasına təhvil verilib.
Yanğın nəticəsində ümumi sahəsi 48 kvadratmetr olan mənzilin bir otağında ev əşyaları 1 kvadratmetr sahədə yanıb, otağın döşəmə və divarları ziyan görüb. Mənzilin böyük hissəsi və qonşu mənzillər yanğından mühafizə olunub.
[gallery columns="1" link="file" size="full" ids="112208"]
