“Bakı KOB evi”ndə “İSO 37001:2016 Korrupsiyaya qarşı mübarizə idarəetmə sistemi”nə dair tədbir keçirilib. Bu barədə Report 16 mart tarixində xəbər verib.
Tədbir İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyinin (KOBİA), Azərbaycanda inspeksiya və sertifikatlaşdırma sahəsində fəaliyyət göstərən “SGS Azərbaycan” şirkətinin, Azərbaycan Standartlaşdırma İnstitutunun və “Caspian Energy Club”ın təşkilatçılığı ilə baş tutub.
Müvafiq dövlət qurumlarının və sahibkarların iştirakı ilə bu gün keçirilmiş tədbirin məqsədi iştirakçıları korrupsiyaya qarşı mübarizə sahəsində “İSO 37001:2016” beynəlxalq standartının tətbiqi imkanları və sertifikatlaşdırma prosesi haqqında məlumatlandırmaq olub.
Tədbirdə çıxış edən Baş Prokurorun müavini, Baş Prokuror yanında Korrupsiyaya qarşı Mübarizə Baş İdarəsinin rəisi Nazim Rəcəbov, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli, KOBİA-nın İdarə Heyətinin (İH) sədri Orxan Məmmədov, KOBİA yanında İctimai Şuranın üzvü, "Azərbaycan Kibertəhlükəsizlik Təşkilatları Assosiasiyası" İctimai Birliyinin İH-nin sədri Elvin Balacanov Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev ölkəmizdə korrupsiya hallarına qarşı mübarizə və qarşısının alınması istiqamətində həyata keçirilən tədbirlər, dövlət qurumları tərəfindən vətəndaşlara, o cümlədən sahibkarlara göstərilən xidmətlərin rəqəmsallaşdırılması, korrupsiya risklərinə qarşı effektiv idarəçilik, “İSO 37001:2016” beynəlxalq standartın tətbiqi məsələləri barədə məlumat veriblər.
Dövlət qurumları və özəl sektorun təmsilçilərinin iştirakı ilə keçirilmiş tədbirdə “İSO 37001:2016 Korrupsiyaya qarşı mübarizə idarəetmə sistemi” barədə iştirakçılar məlumatlandırılıb, bu yöndə müzakirələr aparılıb.
“SGS Azərbaycan” şirkətinin direktoru Seymur Ağayev şirkətin fəaliyyəti, inspeksiya və təftiş, sertifikatlaşdırma sahəsində fəaliyyət və beynəlxalq təcrübə barədə danışıb. Azərbaycan Standartlaşdırma İnstitutunda baş direktorun müavini Kəmalə Məmmədzadə “Azərbaycanda AZS İSO 37001 standartının tətbiqi perspektivləri”, “SGS Azərbaycan” şirkətinin baş auditoru Asif Əmirsultanov “İSO 37001:2016 standartının əsas tələbləri və praktiki tətbiqi”, şirkətin şöbə müdiri Nigar Əliyeva isə “İSO 37001:2016 sertifikatlaşdırma prosesi” barədə təqdimatlarla çıxış edib, iştirakçıları maraqlandıran sualları cavablandırıblar.
