Paytaxtın Sabunçu rayonunda məzarları dağıdan şəxs saxlanılıb. Bu barədə İnsanoid Daxili İşlər Nazirliyi və Baş Prokurorluğa istinadən bu gün, 21 aprel tarixində xəbər verir.
Bakı şəhəri, Sabunçu rayonu, Balaxanı bələdiyyəsinin balansında olan qəbiristanlıqda məzarların dağıldılması faktına görə Sabunçu rayon polis idarəsində Cinayət Məcəlləsinin 245-ci (qəbir üzərində təhqiredici hərəkət) maddəsi ilə cinayət işi başlanaraq ibtidai istintaq aparılır.
Həyata keçirilən intensiv tədbirlər nəticəsində cinayət əməlini törətməkdə şübhəli bilinən, qəbiristanlıqda təmir işləri görən 34 yaşlı Seymur Daxilov saxlanılaraq cinayət məsuliyyətinə cəlb edilib.
Qəbir daşlarının düzəldilməsi ilə məşğul olan S. Daxilov yerinə yetirdiyi sifarişin ödənişini ala bilmədiyi üçün bu hərəkətə yol verib.
Cinayət işi üzrə istintaq hərəkətləri davam etdirilir.
