Aprelin 6-da Brüsseldə Azərbaycan Prezidenti İlham Əliyev, Ermənistan Baş naziri Nikol Paşinyan və Avropa İttifaqı (Aİ) Şurasının Prezidenti Şarl Mişel arasında görüş baş tutub. Bu barədə Azərbaycan Prezidentinin mətbuat xidməti məlumat paylaşıb.
Şarl Mişel görüşdən sonra bəyanat yayıb.
Bəyanatda qeyd olunub ki, liderlər 2021-ci ilin dekabrında Brüsseldə keçirdikləri son görüşdən və 2022-ci ilin fevralında Fransa Prezidenti Emmanuel Makronla videokonfransdan sonra baş verənləri qiymətləndiriblər.
Görüşdə üçtərəfli bəyanatın müddəalarına tam əməl olunmasının zəruriliyi təkrarlanıb. Ölkə başçıları humanitar məsələlərə də toxunub, məhbusların azad edilməsinin və itkin düşmüş şəxslərin probleminin həllinin vacibliyini vurğulayıblar. Liderlər, həmçinin Cənubi Qafqazda kommunikasiya infrastrukturunun bərpasını müzakirə ediblər.
Qeyd olunub ki, Soçi Bəyanatına uyğun olaraq aprelin sonunadək Birgə Sərhəd Komissiyasının çağırılması razılaşdırılıb. Komissiyanın mandatı aşağıdakılardan ibarət olacaq:
1. Ermənistan və Azərbaycan arasında ikitərəfli sərhədin delimitasiyası;
2. Sərhəd xətti boyunca və onun yaxınlığında sabit təhlükəsizlik vəziyyətinin təmin edilməsi.
Sözügedən bəyanatın tam mətni ilə buradan tanış olmaq olar.
Görüşün yekunu olaraq Aİ Şurasının Prezidenti jurnalistlərə müsahibə verib.
LIVE after the meeting with the President of the Republic of Azerbaijan Ilham Aliyev @presidentaz and the Prime Minister of the Republic of Armenia @NikolPashinyan https://t.co/XshAQL1exj
— Charles Michel (@eucopresident) April 6, 2022
Tərəflərin sülh müqaviləsinə yaxınlaşmaları barədə suala cavabında Şarl Mişel bildirib ki, görüşdə bu istiqamətdə mühüm addım atılıb. Lakin əlavə edib ki, sazişin hazırlanmasının nə qədər çəkəcəyini proqnozlaşdırmaq çətindir.
Qeyd edək ki, görüş Bakı vaxtı ilə saat 21:00-da başlayıb və 4 saatdan artıq davam edib.
