1992-ci ilin sentyabr ayında verilən Fərmana əsasən, 14 Fevral - Azərbaycan Hərbi Hava Qüvvələri (HHQ) Günü kimi qeyd edilir.
HHQ-nin yaranma tarixi 1919-cu il hesab olunur. Hərbi nazir Səməd bəy Mehmandarov 1919-cu ildə Azərbaycanın Gürcüstandakı nümayəndəsinə məktub yollayaraq, azərbaycanlıların Tiflisdəki Aviasiya məktəbində təhsil alması ilə bağlı müraciət edib. Həmil il bir çox tələbə Gürcüstanda təhsil almağa göndərilib.
Azərbaycan HHQ-nin milli hərbi qurum kimi formalaşdırılması 1992-ci ildə davam etdirilib. 1992-ci ildə Azərbaycanda Hərbi Hava Qüvvələrinin strukturu milliləşdirilib. Bir müddət keçdikdən sonra Hərbi Hava Qüvvələri və Hava Hücumundan Müdafiə Qoşunları (HHMQ) birləşdirilib. 1997-ci ildə Azərbaycanın Ali Hərbi Təyyarəçilik Məktəbi ilk milli hərbi təyyarəçilərin buraxılışına başlayıb.
2005-ci ildən başlayaraq Azərbaycanda müdafiəyə ayrılmış vəsaitlərin böyük hissəsi məhz HHQ və HHMQ-nin inkişafına sərf edilib. Hazırda Azərbaycan HHQ-nin pilotları Müstəqil Dövlətlər Birliyi məkanında ən çox uçuş keçirmiş pilotlar hesab edilir. Azərbaycanda təhsil alan pilotlar Türkiyə, Ukrayna, ABŞ və digər ölkələrdə olan ixtisasartırma kurslarında və təlimlərdə iştirak edirlər.
