Televiziya yaradılması haqqında qərar 1953-cü ilin dekabrında Bakıda qəbul edilib. Bakı Televiziya Mərkəzi üçün binanın inşasına 1954-cü ildə başlanıldı və 1955-ci ilin sonunda təhvil verildi. 1956-cı ilin fevralına qədər isə Bakı studiyasının sınaq verilişləri yayımlanırdı.
14 fevral 1956-cı ildə gənc aktrisa Nəcibə Məlikova tamaşaçıları “Göstərir Bakı!” sözləri ilə televiziyanın fəaliyyətə başlaması münasibətilə təbrik edib. Həmin gün ekranda “Bəxtiyar” bədii filmi nümayiş etdirilib. 14 fevral Azərbaycan televiziyasının yaranma günü hesab edilir. Bu, Şərqin ilk televiziyasıdır.
İlk illərdə Bakı studiyası əvvəlcə həftədə iki, sonra üç dəfə 2 saatlıq proqramla efirə çıxırdı. Televiziya işçiləri hər gün toplaşaraq tamaşaçılara nə göstərəcəkləri haqda kollektiv surətdə qərar qəbul edirdilər.
1957-ci ildən Azərbaycan Televiziyası efirə həftədə 5 dəfə çıxmağa başladı və verilişlərin gündəlik həcmi 2 saat 20 dəqiqəyə çatdırıldı. İlk xəbər buraxılışı 1960-cı ildən efirə verilməyə başladı. İlk dövrdə bu veriliş “Günün yenilikləri” adlanırdı, sonradan “Son xəbərlər” adı ilə həftədə 5 dəfə efirdə göstərilirdi.
Qurum 1970-ci ildə Dövlət Televiziya və Radio Verilişləri Komitəsi statusunu aldı. 1973-cü ildən isə Azərbaycan televiziyasının proqramları rəngli yayımlanmağa başladı.
1985-ci ildə Azərbaycan Televiziyası texniki təchizatına, film istehsalı və müxtəlif proqramlarla Mərkəzi Televiziyadakı çıxışlarına görə SSRİ-də 4-cü yerə çıxdı. Videokameralar vasitəsilə çəkilişlər aparmaq, montaj etmək, həm də birbaşa efirə çıxmaq mümkün oldu.
19 yanvar 1990-cı ildə saat 19:26-da Azərbaycan televiziyasının enerji bloku sovet qoşunları tərəfindən partladıldı. Yayımı yalnız yanvarın 28-də bərpa etmək mümkün oldu. Qara kostyumda və qalstuksuz efirə çıxan diktor Rafiq Hüseynov 138 dinc sakinin qətlə yetirilməsi ilə əlaqədar xalqa başsağlığı verdi.
2005-ci ildən Prezident İlham Əliyevin Sərəncamı ilə şirkət “Azərbaycan Televiziya və Radio Verilişləri” Qapalı Səhmdar Cəmiyyətinə çevriləndən sonra televiziya 24 saatlıq fasiləsiz yayıma keçdi.
