Mübariz İbrahimov 7 fevral 1988-ci ildə Biləsuvar rayonunun Əliabad kəndində anadan olub.
Mübariz 1994-2005-ci illərdə orta təhsilini Əliabad kənd orta məktəbində alıb. Daha sonra o, hərbi xidmətə yollanıb. Mübariz xidmətinə Daxili Qoşunların N saylı hərbi hissəsinin Xüsusi Təyinatlı Bölüyündə başlayıb. Həmin zaman Mübariz İbrahimov “Mən yolumu seçmişəm. Düşməndən ürəyimcə qisas almasam, elə bilərəm ki, Allahım da, valideynlərim də məni bağışlamaz. Vətənin azadlığı üçün qurban lazımdırsa, biri mən...” - deyib.
18 iyun 2010-cu ildə Tərtər rayonunun Çaylı kəndi yaxınlığında bir qrup erməni hərbçisi atəşkəsi pozaraq, mövqelərimizə hücuma keçir. 19 iyun 2010-cu ildə Mübariz İbrahimov heç kimə xəbər vermədən 1 km-lik minalanmış sahəni keçir və təkbaşına düşmənin çox sayda canlı qüvvəsini məhv edir. Mübariz İbrahimov bu qeyri-bərabər döyüşdə qəhrəmancasına şəhid olur. O, Bakı şəhərindəki II Şəhidlər xiyabanında dəfn edilir.
Onun evə yazdığı məktubundan: “Canım atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə artıq ürəyim dözmür. Allaha xatir bunu etməliyəm. Ən azından ürəyim sərinlik tapar. Şəhid olanadək bu şərəfsizlərin üzərinə gedəcəyəm. Şəhid olsam, ağlamayın. Əksinə, sevinin ki, o mərtəbəyə yüksəldim... Vətən sağ olsun. Oğlunuz Mübariz. Haqqınızı halal edin”.
Mübariz İbrahimova Respublikanın müstəqilliyi və ərazi bütövlüyünün qorunmasında müstəsna xidmətinə və göstərdiyi rəşadətə görə ölümündən sonra “Azərbaycanın Milli Qəhrəmanı” adı verilib. O, həmçinin “Qızıl Ulduz” medalı, “Vətən övladı” ordeni ilə təltif edilib. 2010-cu ildə Mübariz İbrahimova həsr edilən “Müqəddəs zirvə” adlı film çəkilib.
