Əhməd Cavad Axundzadə 5 may 1892-ci ildə Şəmkirin Seyfəli kəndində anadan olub.
O, ilk təhsilini mollaxanada alır, sonra isə ailəsilə Gəncəyə köçür və buradakı Şah Abbas məscidinin nəzdində fəaliyyət göstərən ruhani seminariyasında təhsil alır. Əhməd Cavad ilk şeirlərini də məhz seminariyada oxuyarkən qələmə alır. Gənc şairin əsərləri 1913-cü ildən çap olunmağa başlayır. 1916-cı ildə “Qoşma” adlı ilk şeirlər kitabı çapdan çıxır.
Şair 1922-ci ildə Bakıda Pedaqoji Ali Məktəbə daxil olur, buranı bitirdikdən sonra Azərbaycan Politexnik İnstitutunda, Kənd Təsərrüfatı İnstitutunda dərs deyib, rus dili üzrə Azərbaycanın ilk professorlarından biri olub.
Onun məşhur “İstiqlal uğrunda şeirlər” kitabı 1928-ci ildə İstanbulda çap olunur və bununla da onu sovet hakimiyyəti təqib etməyə başlayır. 3 iyun 1937-ci ildə Əhməd Cavadı Yazıçılar İttifaqının üzvlüyündən çıxarırlar. Beş gün sonra isə həbs edirlər.
Professor “Çırpınırdı Qara dəniz”, “Susmaram”, “Göygöl”, “Azərbaycan bayrağına” və başqa şeirləri qələmə alıb. O, həmçinin Azərbaycan Dövlət Himninin sözlərinin müəllifidir.
İctimai xadim 13 oktyabr 1937-ci ildə “xalq düşməni” damğası ilə güllələnir. Şair yalnız 1955-ci ilin dekabrında bəraət alır.
Qeyd edək ki, Prezident İlham Əliyevin aprelin 20-də imzaladığı sərəncama əsasən, bu il Əhməd Cavadın 130 illiyi qeyd ediləcək.
