27 sentyabr 2020-ci ildə Ermənistan Respublikasının silahlı qüvvələri bir neçə istiqamətdən Azərbaycan Respublikasının yaşayış məntəqələrini və hərbi mövqelərini atəşə tutub. Bu təxribata cavab olaraq Azərbaycan Ordusunun başlatdığı Vətən müharibəsi 44 gün sonra noyabrın 10-da ölkəmizin qələbəsi, Ermənistanın ağır məğlubiyyəti ilə sona çatdı.
10 noyabr 2020-ci ildə Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan arasında bəyanat imzalanıb. Həmin bəyanata əsasən, Kəlbəcər 15 noyabr Azərbaycana qaytarılmalı idi.
Bəyanat imzalandıqdan bir müddət sonra Ermənistan tərəfi ordunun və orada qanunsuz olaraq yerləşdirdiyi insanların rayondan çıxarılması üçün əlavə 10 gün vaxt istədi. Həmin zaman tarix dəyişdirilərək, 25 noyabradək uzadıldı. Lakin ermənilər Kəlbəcəri tərk edərkən evləri və meşələri yandırdılar, heyvanları öldürdülər. Buna baxmayaraq, Kəlbəcər rayonu bir güllə atılmadan azad edildi.
Kəlbəcər rayonu 2 aprel 1993-cü ildə Ermənistan Respublikasının silahlı birləşmələri tərəfindən işğal olunub. Nəticədə 55 hərbçi, 511 dinc sakin öldürülüb, 321 nəfər əsir götürülüb və itkin düşüb. Kəlbəcər rayonunun 60 minə yaxın sakini respublikanın 56 rayonunda müvəqqəti məskunlaşmağa məcbur olub.
