10 noyabr 2020-ci ildə Prezident İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyan arasında üçtərəfli Bəyanat imzalanıb. Bu sənədin imzalanması ilə atəşkəs elan olundu, 44 günlük müharibə Azərbaycanın tam qələbəsi, Ermənistanın hərbi kapitulyasiyası ilə nəticələndi.
Bəyanata əsasən, Ağdam, Laçın, Kəlbəcər rayonları qan tökülmədən Azərbaycana qaytarıldı. Rusiya sülhməramlı kontingenti Dağlıq Qarabağdakı təmas xətti boyunca yerləşdirildi. İki il ərzində razılaşmanın bəndlərinə uyğun olaraq, Ermənistanla Dağlıq Qarabağı birləşdirən, Laçın və Şuşa şəhərlərindən yan keçən yeni dəhlizin marşrutu müəyyən edildi. Yeni yolun çəkilməsi ilə Laçın şəhəri və Sus, Zabux kəndləri 26 avqust 2022-ci ildə Azərbaycanın nəzarətinə qaytarıldı.
Lakin Ermənistan tərəfindən bəzi maddələr hələ də yerinə yetirilməyib. Razılaşmaya görə, Rusiya Federasiyasının sülhməramlı kontingenti erməni silahlı qüvvələrinin bölgədən çıxarılması ilə paralel şəkildə yerləşdirilməli idi. Lakin erməni silahlı qüvvələri hələ də tam şəkildə bölgədən çıxarılmayıb və hərbi təxribatlar törətməyə cəhd edirlər.
Növbəti yerinə yetirilməyən maddə “Zəngəzur dəhlizi” məsələsidir. Bəyanatın sonuncu maddəsində regiondakı bütün iqtisadi və nəqliyyat əlaqələrinin bərpa edilməsi nəzərdə tutulur. Bu bənddə ikinci cümlə Azərbaycan və Naxçıvan arasında nəqliyyat əlaqəsinin təşkilindən və Ermənistanın hər iki istiqamətdə maneəsiz hərəkətin təhlükəsizliyinə zəmanətindən bəhs edilir. Lakin Ermənistan tərəfi nəqliyyat dəhlizlərinin açılmasında hələ də razılığa gələ bilməyib.
Mənbələr:
