Martın 1-dən Azərbaycandakı ödəniş terminallarında əlavə xidmət haqqı müəyyən olunub. Sosial şəbəkə istifadəçiləri isə hesab edirlər ki, terminallarla ödənilən kommunal xidmətlərin haqqı qismən bahalaşa bilər. Bununla bağlı 5 aprel tarixində Report aydınlıq gətirib.
Belə ki, bir necə bank öz müştərilərinə artıq banklardakı kart hesablarına pul qoyduqda 1% komissiya tədbiq edilməsi haqqında məlumat göndərib. Məsələn, “Azər-Türk Bank” ASC bəyan edib ki, bundan sonra ödəniş terminalları ilə həyata keçirilən bütün əməliyyatlara görə 1% xidmət haqqı tutulacaq. “Turan Bank” ASC isə bildirib ki, terminallarla mədaxilə görə 0,5% və ya minimum 1 manat komissiya hesablanacaq. Qalan 0,5% komissiya bank tərəfindən ödəniləcək.
Kommunal xidmətlərin ödənişlərinə gəldikdə isə “Azərişıq” ASC-nin mətbuat xidmətinin rəhbəri bildirib ki, elektrik enerjisi istehlakçıları əlavə komissiya ödəməyəcək: “Komissiyanı “Azərişıq” özü ödəyəcək”.
“Azərsu” ASC-nin və Dövlət Neft Şirkətinin (SOCAR) “Azəriqaz” İstehsalat Birliyinin mətbuat xidmətinin rəhbərinin də sözlərinə görə, abonentlərdən əlavə ödəniş tələbi yoxdur.
Məlumata əsasən, dövlətə məxsus "Aztelekom" və "Baktelecom" MMC-lər telefon və internet xidmətlərinin haqqının ödənilməsi üçün əlavə faiz tutmağı planlaşdırmır.
