Milli Məclisdə Azərbaycanın Fransa ilə diplomatik əlaqələrinin dayandırılması təklif edilib. Bunu Ana Vətən Partiyasının sədri, deputat Fəzail Ağamalı deyib.
Onun sözlərinə görə, vaxtilə Afrikada, Əlcəzairdə 1,5 milyon insanı qətlə yetirən, amma II Dünya müharibəsi zamanı bir güllə atmayan Fransa indi Azərbaycana qarşı əsl simasını ortaya qoyur.
Partiya sədri söyləyib ki, Emmanuel Makron bir müddət əvvəl Ermənistanı demokratik dövlət adlandırıb və siyasətin davamı olaraq Senat anti-Azərbaycan qətnaməsini qəbul edib.
“Zamanında Avropa ölkələrinin rəsmiləri Prezident İlham Əliyevlə görüşüb, ölkəmizin neft və qazına xüsusi maraq göstəriblər, hətta müvafiq razılaşma da əldə edilib. 20-30 min erməniyə müstəqillik tələb etməklə Fransa absurda yol verir və bundan utanmır. Mən təklif edirəm ki, Fransa ilə diplomatik əlaqələr dayandırılsın”, - deyə millət vəkili bildirib.
Qeyd edək ki, qətnamədə Fransanın və digər Avropa İttifaqı ölkələrinin “Azərbaycandan idxal edilən qaz və neftə embarqo tətbiq etmək” çağırışı yer alıb.
