Azərbaycanın tanınmış cüdoçusu Elmar Qasımov peşəkar karyerasını başa vurub. Bu barədə Report 27 fevral tarixində məlumat verib.
33 yaşlı idmançı bu barədə Azərbaycan Cüdo Federasiyasını məlumatlandırıb.
100 kq çəki dərəcəsində çıxış edən Qasımov cüdonun onun həyatında mühüm rol oynadığını bildirib:
"Karyeram boyu hər zaman Möhtərəm Prezident İlham Əliyevin bütün idmançılara olduğu kimi, mənə də diqqət və qayğısını hiss etmişəm və buna görə də ölkə başçısına dərin minnətdarlığımı bildirirəm. Həmçinin bu yolda məni müşayiət edən məşqçilərim Fərhad Məmmədova, Əli Dəvrişova, Ağayar Axundzadəyə, Hacıağa Hacıəhmədova, Mövlud Mirəliyevə, o cümlədən əldə etdiyim nailiyyətlərdə mənə dəstək olan Azərbaycan Cüdo Federasiyasına, yığmanın tibbi və texniki heyətinə təşəkkürümü bildirirəm. Hazırda hədəflərim başqadır və diqqətimi yeni planlarıma yönəltmək istəyirəm".
Elmar Qasımov 2016-cı il Rio Yay Olimpiya Oyunlarının gümüş medalçısı olmaqla yanaşı, 2009-cu ildə İrəvan şəhərində keçirilən gənclərin Avropa çempionatında qızıl medal qazanıb.
