Ötən gecə mövqelərimiz fasilələrlə atəşə tutulub. Bu haqda bu gün, 23 noyabr tarixində Müdafiə Nazirliyi məlumat yayıb.
Noyabrın 22-si saat 22:15-dən noyabrın 23-ü saat 01:15-dək Ermənistan silahlı qüvvələrinin bölmələri İstisu və Basarkeçər rayonunun Günəşli yaşayış məntəqələri istiqamətlərində atəşkəsi pozub. Ordumuzun Kəlbəcər rayonunun İstisu və Daşkəsən rayonunun Astaf yaşayış məntəqələri istiqamətlərində yerləşən mövqeləri müxtəlif çaplı atıcı silahlardan atəşə tutulub.
Həmçinin noyabrın 22-si saat 15:48-dən 18:20-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən ordumuzun Şuşa şəhəri və Tərtər rayonu istiqamətlərində yerləşən mövqelərinə atəş açılıb.
Ordumuz tərəfindən qeyd olunan istiqamətlərdə adekvat cavab tədbirləri görülüb.
