Firidun bəy Əhməd ağa oğlu Köçərli 26 yanvar 1863-cü ildə Şuşada ziyalı ailədə anadan olub. 1870-1872-ci illərdə Şuşa şəhərinin mollaxanasında, 1872-1875-ci illərdə Mirzə Kərim Münşizadənin məktəbində, 1876-1879-cu illərdə 2-ci dərəcəli şəhər məktəbində oxuyub.
1885-ci ildə Qori Müəllimlər Seminariyasını bitirdikdən sonra Firidun bəy 1885-1896-cı illərdə İrəvan gimnaziyasında, 1896-1917-ci illərdə isə Qori Müəllimlər Seminariyasının Azərbaycan şöbəsində müəllim işləyib. 1899-cu ildə III dərəcəli “Müqəddəs Anna”, 1902-ci ildə isə II dərəcəli “Müqəddəs Stanislav” ordenləri ilə təltif olunub.
Firidun bəy Köçərli, həmçinin tərcüməçi kimi də fəaliyyət göstərib. O, qədim yunan filosofu Sokratın “Təlimati-Sokrat” kitabını, rus yazıçıları Aleksandr Puşkin, Mixail Lermontov və Anton Çexovun əsərlərini Azərbaycan dilinə, Mirzə Fətəli Axundzadənin “Aldanmış kəvakib” povestini rus dilinə tərcümə edib. 1908-ci ildə üçcildlik “Azərbaycan ədəbiyyatı” kitabını hazırlayıb.
1918-ci ildə Qori Müəllimlər Seminariyasının Azərbaycan şöbəsini tədris ləvazimatı və avadanlığı ilə birlikdə öz vəsaiti hesabına Qazax şəhərinə köçürmüş, bunun əsasında Azərbaycan Müəllimlər Seminariyası yaradılmışdır. Həmin vaxt Firidun bəy Köçərli seminariyanın direktoru təyin olunmuşdur.
Köçərli 1917-ci ildən siyasi proseslərə qoşulub, “Müsavat” partiyasına daxil olub. 1918-ci il mayın 28-də Azərbaycan Milli Şurasının üzvü seçilərək “İstiqlal bəyannaməsi”ni imzalayanlardan biri olub.
1920-ci ildə Gəncə üsyanı yatırıldıqdan sonra bolşeviklərə qarşı etirazların iştirakçısı kimi 58 yaşında güllələnərək öldürülüb.
