2024-cü ildə Füzuli şəhərinə ilk köç planlaşdırılır. Bunu Dövlət Şəhərsalma və Arxitektura Komitəsi sədrinin birinci müavini Namiq Hümmətov bildirib.
Bu barədə 12 aprel tarixində Report məlumat verib.
"Bu istiqamətdə çox ciddi işlər aparılır. Məcburi köçkünlərin qayıtması üçün digər layihələrin icrası sürətləndirilməlidir. Ümumilikdə 2023-cü ildə 399, 2024-cü ildə 447, 2025-ci ildə 2 317, 2026-cı ildə 2 515 evin inşası həyata keçiriləcək. Mənzil İnşaatı Dövlət Agentliyinin inşa etdiyi 846 mənzillik yaşayış kompleksinə gələn il 2 904 nəfər köçürüləcək. Bütövlükdə tikiləcək evlərə 21 593 nəfərin, o cümlədən Füzuli şəhərinə 8 009 nəfərin köçürülməsi planlaşdırılır", - deyə o qeyd edib.
Bundan başqa, sədr müavininin sözlərinə görə, qısa müddətdə Füzulidə Mərkəzi Xəstəxananın tikintisinə başlanılacaq: "Təhsil Nazirliyi isə peşə liseyinin tikintisinə başlayacaq. 2024-cü ildə minimum yaşayış şəraiti yaratmalıyıq. Bu hədəflə işlərimiz davam edir".
