GUAM Parlament Assambleyasının 17-ci Büro iclasında Fransa Senatının Azərbaycana qarşı qərəzli qətnamə qəbul etməsi pislənilib. Bu barədə Report 28 noyabr tarixində məlumat verib.
Məlumata əsasən, toplantıda Milli Məclisin deputatı, GUAM PA-da Azərbaycan nümayəndə heyətinin rəhbəri Elnur Allahverdiyev çıxış edib.
O, diqqəti Azərbaycan və Ermənistan arasında normallaşma proseslərinə, bu istiqamətdə göstərilən beynəlxalq səylərə yönəldib.
Avropa İttifaqı Şurasının prezidenti Şarl Mişelin vasitəçiliyi, eləcə də Fransa prezidentinin iştirakı ilə aparılan danışıqlarda Ermənistanın Azərbaycanın ərazi bütövlüyünü tanımasını sülh prosesində mühüm addım kimi dəyərləndirən deputat bir neçə gün sonra Fransa prezidentinin Azərbaycana qarşı reallıqdan uzaq, böhtan xarakterli açıqlamalar verməsinin və bu ölkənin Senatının Azərbaycana qarşı qərəzli qətnamə qəbul etməsinin isə heç bir məntiqə sığmadığını bildirib. Bunu tarixə qovuşmuş münaqişəni yenidən alovlandırmaq cəhdi kimi dəyərləndirən deputat belə hərəkətlərin Azərbaycanla Ermənistan arasında post-münaqişə dövründə davam edən normallaşma prosesinə xələl gətirdiyini vurğulayıb.
E.Allahverdiyev Cənubi Qafqazda dayanıqlı sülhün və əməkdaşlığın inkişafı üçün əldə olunmuş razılaşmaların bütün şərtlərinə əməl etməyin vacib olduğunu bildirib.
Sessiyada GUAM PA-ya sədrlik Moldovadan Ukraynaya keçib, iclasın sonunda yekun sənəd olaraq kommünike qəbul olunub.
[caption id="attachment_95971" align="alignnone" width="640"]
Foto Report.az saytı[/caption]
