İçərişəhərdə Vətən müharibəsi şəhidi Fərid Əliyevin adını daşıyan küçənin açılış mərasimi olub. Bu barədə İnsanoid “İçərişəhər” Dövlət Tarix-Memarlıq Qoruğu İdarəsinin Mətbuat Xidmətinə istinadən bu gün, 11 aprel tarixində xəbər verir.
İçərişəhər sakini olmuş şəhid Fərid Əliyevin adını əbədiləşdirəcək küçənin açılış mərasimində şəhidimizin ailə üzvləri, yaxın qonşuları, şəhid ailələri, “İçərişəhər” DTMQİ-nin İdarə Heyətinin sədri Şahin Seyidzadə, Səbail RİH-nin başçısı Vüqar Zeynalov, YAP Səbail rayon təşkilatının sədri Muxtar Nağıyev, Cümə məscidinin axundu Hacı Surxay, İçərişəhər Ağsaqqallar Şurasının sədri Teymur İslamzadə, Şuranın üzvləri və “Qoru“ Gənclər Təşəbbüs qrupunun üzvləri iştirak ediblər.
Şəhid Əliyev Fərid Pirəli oğlu 14 avqust 1994-cü il tarixində Bakı şəhərində anadan olub. 2010-cu ildə 132 saylı tam orta məktəbi bitirib. 2012-ci ildə təhsilini davam etdirdiyi peşə liseyindən məzun olub. 2012-2014-cü illərdə Azərbaycan Silahlı Qüvvələri sıralarında xidmət edib.
5 noyabr 2020-ci il tarixində Şuşa istiqamətində gedən döyüşlərdə qəhrəmancasına şəhid olub.
Şəhid Fərid Əliyev 3-cü dərəcəli “Vətənə xidmətə görə” ordeni, “Cəbrayılın azad olunmasına görə”, “Vətən uğrunda”, “Cəsur döyüşçü” və “Şuşanın azad olunmasına görə” medalları ilə təltif edilib.
