Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən “Sevincini bölüş” xeyriyyə kampaniyası çərçivəsində ianə qutularına toplanan oyuncaqların xüsusi qayğıya ehtiyacı olan uşaqlara paylanmasına başlanıb. Bu barədə 1 mart tarixində IDEA İctimai Birliyi məlumat verib.
Belə ki, toplanmış ilk oyuncaqlar 1 saylı sağlamlıq imkanları məhdud uşaqlar üçün sosial xidmət müəssisəsindəki uşaqlara hədiyyə olunub.
İndiyə qədər IDEA İctimai Birliyinin “Sevincini bölüş” xeyriyyə kampaniyası çərçivəsində Bakının üç məkanında, o cümlədən Gənclik Mall, 28 Mall və Dəniz Mall ticarət mərkəzlərində oyuncaq ianə qutuları yerləşdirilib.
Sözügedən qutulara insanlar özlərinin və ya övladlarının artıq istifadə etmədikləri və paylaşmaq istədikləri oyuncaqları yerləşdirə bilərlər. İanə edilən oyuncaqların qutulara atmaqdan öncə təmizlənməsi, qutulara kənar əşyalar və ya tullantılar atılmaması xahiş edilir.
[gallery link="file" size="full" ids="107527,107528,107529"]
