Ermənilər hər yerdə olduğu kimi, futbolda da öz çirkin əməllərindən əl çəkmir, erməni xislətini növbəti dəfə nümayiş etdirirlər. Bu barədə Report 16 yanvar tarixində məlumat verib.
İtaliyanın “İnter” klubunun erməni futbolçusu Henrix Mxitaryan da yenidən sevimli təxribatlarına davam edir.
Milan təmsilçisinin telekanalında yayımlanan bir rubrikada özü haqqında danışan Mxitaryan haralı olması ilə bağlı suala cavab verərkən bunu xəritədə göstərmək qərarına gəlib. Bunun üçün isə o, Ermənistanın və Azərbaycan ərazisinin bir hissəsini çəkib.
Dünyada heç bir dövlət, hətta Ermənistanın özü tərəfindən belə tanınmayan Qarabağdakı qondarma qurumu öz ölkəsinin bir hissəsi kimi qeyd etmək yumşaq desək, qonşu dövlətin ərazi bütövlüyünə hörmətsizlik, beynəlxalq hüquqa, həmçinin idman “fair-play” qaydalarına zidd hərəkət, hətta tərbiyəsizlikdir.
Maraqlıdır ki, bu, ilk belə hal, Milan “İnter”i də Mxitaryanın tələsinə düşən ilk klub deyil. O, daha əvvəl də öz “qədim” cəfəngiyyatını çıxış etdiyi böyük klubların çoxmilyonlu azarkeş bazasından istifadə edərək pis bir qoxu kimi yaymağa, insanların beyinlərini qarışdırmağa çalışıb. Bu, İngiltərə “Arsenal”ı, Almaniya “Borussiya”sı (Dortmund), hətta İtaliyanın digər təmsilçisi “Roma”da çıxış edərkən də müşahidə olumuşdu.
Görünür, Şuşada tikdirdiyi villası üçün darıxan Mxitaryan işğaldan azad etdiyimiz torpaqlarımızda təpəsinə dəyən “Dəmir yumruq”dan o qədər sərsəmləyib ki, nostalgiyadan ayıla bilmir.
Məsələ ilə bağlı AFFA-nın Mətbuat və İctimaiyyətlə Əlaqələr Departamentinin sədri Firuz Abdulla açıqlamasında qeyd edib ki, məsələ barəsində qurumun məlumatı var:
“Artıq müvafiq prosedurların həyata keçirilməsinə başlanılıb. Zəruri hüquqi sənədlər hazırlanaraq gün ərzində UEFA-ya və İtaliya Futbol Federasiyasına (FIGC) müvafiq müraciət ünvanlanacaq”.
