Mədəniyyət Nazirliyində yeni təyinat olub. Bu barədə 14 mart tarixində Report məlumat verib.
Belə ki, Aynur Nurəddin qızı Kərimova nazirliyin Media və kommunikasiya şöbəsinin müdiri təyin edilib.
Qeyd edək ki, A.Kərimova Bakı Dövlət Universitetində (BDU) jurnalistika ixtisası üzrə bakalavr, magistr və aspirantura təhsili alıb. O, müxtəlif illərdə BDU-nun Televiziya və radio jurnalistikası kafedrasının müdiri, Ailə, Qadın, Uşaq Problemləri üzrə Dövlət Komitəsinin Sosial-analitik araşdırmalar departamentinin rəhbəri, İnnovasiya və Rəqəmsal İnkişaf Agentliyinin Mətbuatla iş şöbəsinin müdiri, “Barama Media”nın icraçı direktoru kimi fəaliyyət göstərib.
2009-cu ildən filologiya üzrə fəlsəfə doktorudur. 2022-ci ildən Azərbaycan Dövlət Mədəniyyət və İncəsənət Universitetində yeni magistr proqramlarının yaradılması və kurikulum dizaynı ilə bağlı işçi qrupda fəaliyyət göstərir. “Texnopolis”, “Sima” sənədli media layihələrinin müəllifidir.
