18-20 may tarixlərində Bakı Ekspo Mərkəzində 15-ci Yubiley Azərbaycan Beynəlxalq “Kənd təsərrüfatı” Caspian Agro və 27-ci Azərbaycan Beynəlxalq “Qida Sənayesi” InterFood Azerbaijan sərgiləri keçiriləcək. Bu haqda sərgiləri təşkil edən Caspian Event Organisers şirkətinin saytında aprelin 6-da məlumat verilib.
Sərgi iştirakçıları arasında Azərbaycan, Gürcüstan, İsrail, İspaniya, İtaliya, Hollandiya, Rusiya, ABŞ, Türkiyə və Ukrayna şirkətləri olacaq.
Tədbir çərçivəsində yeni Smart Agro istiqaməti təqdim ediləcək. Sözügedən istiqamət Ağıllı Kənd, Əşyaların İnterneti, Süni İntellekt, İT xidmətləri, Pilotsuz uçuş aparatları, eləcə də Robot kompleksləri kimi sektorları əhatə edəcək.
Həmçinin sərginin ilk günü “Smart Agro: “Kənd Təsərrüfatında İnnovasiyaların təbliği” konfransı keçiriləcək.
InterFood Azerbaijan sərgisində Azərbaycan, Hindistan, İtaliya, Litva, Rusiya, Səudiyyə Ərəbistanı, Sloveniya, Türkiyə və Şri-Lanka şirkətləri iştirak edəcək. Eyni zamanda, 2-ci Azərbaycan Aşpazlar çempionatı “Chefs cup”ın da keçirilməsi nəzərdə tutulub.
