Bu günə qədər Azərbaycan mebel üçün xammal materialının 70%-ni Ukrayna və Rusiyadan alırdı. Hazırda bu iki ölkə arasında yaşanan gərginlik ölkəmizin mebel sənayesi üçün xammal tədarükündə bir sıra çətinliklər yaradıb. Bu sözləri 1 aprel tarixində Azərbaycan Mebel İstehsalçıları Assosiasiyasının rəhbəri Məşhur Məmmədov Reporta açıqlamasında deyib.
Onun sözlərinə görə, əsas problem nəqliyyat-daşımaçılıq sahəsindədir: “İndi Ukraynada yükləmələr, demək olar ki, yoxdur. Çünki Ukrayna ərazisindən mal tədarük edən nəqliyyat vasitələri Rusiyadan keçirdi. Həmin yol artıq bağlıdır. Digər tərəfdən, Ukraynada xammal satışı ilə məşğul olan şirkətlərin bir çoxu fəaliyyətini dayandırıb”.
Assosiasiyanın rəhbəri, həmçinin söyləyib ki, Rusiya mebel xammalı üçün lazım olan kimyəvi maddələri, əsasən, Avropa ölkələrindən alırdı. Sözügedən ölkənin Avropa ilə əlaqələrinin korlanması həmin məhsulların tədarükündə problem yaradıb. Eyni zamanda, o qeyd edib ki, Rusiyaya bank köçürmələrində də problemlər var.
“Azərbaycanın mebel istehsalçıları xammal əldə etmək üçün yeni bazarlar axtarır. Bu, Avropa ölkələri, Çin və Türkiyə bazarı ola bilər”, - deyə o əlavə edib.
M.Məmmədov mebel ixracından da danışıb və burada problem olmadığını bildirib. Azərbaycan mebelinin əsas ixrac bazarı Gürcüstan, ABŞ, Orta Asiya, Şərqi Afrika və Avropa ölkələridir. O bildirib ki, bu il ölkəmizin 25 milyon dollara yaxın mebel ixrac edəcəyi nəzərdə tutulub.
