Milli Məclisin Fransa Senatının 15 noyabr 2022-ci il tarixli qətnaməsi ilə bağlı hazırladığı bəyanat qəbul edilib. Bu barədə 16 noyabr tarixində Report məlumat verib.
Bəyanat səsverməyə qoyularaq qəbul olunub.
Bəyanatın lehinə 95, əleyhinə isə 1 deputat səs verib.
Daha öncə Milli Məclisdə Fransa Senatının qəbul etdiyi qətnamə ilə bağlı bəyanatın hazırlanması üçün komissiya yaradılıb.
“Fransa Senatının qəbul etdiyi sənəd də Azərbaycana qarşı bədxah və çirkli niyyətli siyasi aksiyadır. Hər sətrindən Azərbaycan xalqı və dövlətinə nifrət yaradan qətnamə Ermənistanın ölkəmizə qarşı ərazi iddiaları və qəsbkarlıq siyasətinə haqq qazandırmaq və niyyətə görə bir akt kimi qiymətləndirilməlidir”, - Milli Məclisin spikeri Sahibə Qafarova bildirib.
Qeyd edək ki, noyabrın 15-i Fransa Senatında ölkəmizə qarşı qətnamə layihəsi müzakirəyə çıxarılmışdır. Səsvermə nəticəsində 295 nəfər qətnamənin lehinə, 1 nəfər isə əleyhinə səs vermişdir.
Fransalı deputatlar Azərbaycana qarşı sanksiyaların tətbiq edilməsini və Ermənistanın silahlandırılmasını müzakirə edərkən, petisiyada imzaların sayı 128 mini keçmişdi. Amma fransızlar üçün bu səslərin heç bir mənası olmayıb.
