“Elektrik enerjisi istehsalında bərpa olunan enerji mənbələrinin payını 16,5%-dən 2030-cu ilə qədər 30%-ə çatdırmağa çalışırıq”. Bu sözləri energetika naziri Pərviz Şahbazov “8-ci Berlin Enerji Keçidi Dialoqu” konfransı çərçivəsində keçirilən panel müzakirələrində çıxış edərkən bildirib.
“Bu gün qarşımızda duran əsas məqsəd enerji sektorunun dayanıqlığını daha da möhkəmləndirməkdir. Bundan ötrü qaz sektorunun inkişafı ilə yanaşı, əsas diqqəti yaşıl enerjinin inkişafına yönəltmişik”, - deyə nazir qeyd edib.
P.Şahbazov söyləyib ki, Azərbaycan enerji sahəsində xarici təchizatçılardan asılılığı və enerji təhlükəsizliyində heç bir problemi olmayan ölkədir.
“Biz hazırda etibarlı tərəfdaş rolumuzu davam etdirir, həm də bərpa olunan enerji mənbələrindən geniş istifadə üzrə planlarımızı icra edirik. Hazırkı kataklizmlər dövründə Azərbaycan yaşıl enerji ilə bağlı hədəflərini problemsiz və fasiləsiz reallaşdıran azsaylı ölkələrdəndir.”
