2022-ci ildə Ailə, Qadın və Uşaq Problemləri üzrə Dövlət Komitəsinin 860 gender əsaslı zorakılıqla bağlı dəstək xəttinə 269 müraciət daxil olub. Bu barədə 14 fevral tarixində APA Komitəyə istinadən məlumat verib.
Bildirilib ki, müraciətlərin əksəriyyəti psixoloji və fiziki zorakılıqla bağlıdır.
"Belə ki, 246 psixoloji, 124 fiziki, 44 iqtisadi, 15 cinsi zorakılıqla bağlı şikayət edilib. Şikayət edənlərin 167 nəfəri partnyoru tərəfindən zorakılığa məruz qalıb" - deyə məlumatda qeyd edilib.
Şikayətlərin 169-u Bakı, 100-ü isə regionlardan daxil olub. Zərərçəkənlərdən 38-i kişi, 231-i qadın olub. Həmçinin 81-i ali, 71-i orta təhsilli, 17-si isə təhsilsiz şəxslər olub. Şikayətçilərdən 203-nü işsiz, 66-sını çalışanlar təşkil edib.
Yaş qruplarına gəlincə, 35 nəfər 0-18, 119 nəfər 19-35, 93 nəfər 36-55 yaş aralığında, 22 nəfər isə 56 yaşdan yuxarı şəxslərdir.
