Bilgəh qəsəbəsi-Novxanı-Sumqayıt layihəsinin tərkib hissəsi olan Pirşağı-Novxanı-Xırdalan-M4 avtomobil yolunun tikintisi başlayıb. Bu barədə İnsanoid Azərbaycan Avtomobil Yolları Dövlət Agentliyinin rəsmi saytına istinadən bu gün, 26 yanvar tarixində xəbər verir.
Məlumata görə, yol boyu ilkin olaraq 9 yol qovşağı, 3 avtomobil keçidi və 3 piyada keçidinin tikintisi nəzərdə tutulur.
Bu yolun tikintisi Abşeron yarımadasının şimal-şərq hissəsindəki yaşayış məntəqələrini Mərdəkan - Bilgəh - Novxanı - Sumqayıt avtomobil yolunun tərkib hissəsi olan Pirşağı-Novxanı-Xırdalan -M4 avtomobil yolu ilə Bakı şəhərinə daxil olmadan Bakı - Quba – Rusiya Federasiyası ilə dövlət sərhədi avtomobil yolu ilə şimal istiqamətində nəqliyyat əlaqəsini təmin etməyə, eləcə də Bakı-Şamaxı-Yevlax magistral avtomobil yoluna çıxmaqla ölkənin qərb zonası ilə nəqliyyat əlaqəsi qurmağa imkan verəcək.
Bununla da paytaxt Bakıya 20 Yanvar ərazisindən daxil olan nəqliyyat vasitələrinin sayının təqribən 20-30 faiz azalması nəzərdə tutulur.
Yol 1b texniki dərəcəyə uyğun olaraq inşa edilir. Layihənin uzunluğu 28 kilometr, yolun hərəkət hissəsinin eni 22,5 metr, ayırıcı zolağın eni 4 metr, hərəkət zolaqlarının sayı 6-dır.
