Sərhədçilər Irandan Azərbaycana 34 kiloqram narkotikin keçirilməsinin qarşısını alıb. Bu barədə aprelin 5-də Dövlət Sərhəd Xidmətindən məlumat verilib.
Martın 31-də Füzuli rayonunun Qazaxlar kəndindəki sərhəd zastavasının xidməti sahəsində İran-Azərbaycan istiqamətində hərəkət edən bir nəfər aşkarlanıb. O, mühəndis çəpərinə yaxınlaşıb və geri qayıdıb. Qeyd olunan ərazidə bağlama tapılıb. İçərisindən 10,5 kiloqram narkotik və dərman preparatları götürülüb.
Aprelin 2-də Biləsuvar rayonu Yuxarı Ağalı kəndində sərhəd naryadının “Dayan” əmrinə tabe olmayan 1 nəfər saxlanılıb. Saxlanılan şəxsin 25 yaşlı Ağsu sakini olduğu müəyyən edilib. Onun üzərindəki bağlamadan 20,3 kiloqram narkotik və dərman preparatları aşkar edilib.
Aprelin 3-də Zəngilan rayonunun Mincivan qəsəbəsində naməlum şəxs İrandan Azərbaycan istiqamətində dövlət sərhədini pozmağa cəhd edib. Cəhdin qarşısı alınıb, sərhəd pozucusu isə əlindəki qaçaqmalı yerə ataraq geriyə qaçıb. Tapılan bağlamadan 3,5 kiloqram narkotik və müxtəlif psixotrop tərkibli həblər götürülüb.
Faktlarla bağlı araşdırmalar davam etdirilir.
