Abşeron, Tərtər, Goranboy, Ucar və Zərdab rayonlarında daha 100 mənzil və fərdi ev şəhid ailələri və müharibə ilə əlaqədar əlilliyi olan şəxslərə, həmçinin digər imtiyazlı şəxslərə (gözdən əlilliyi olan şəxslər, Çernobıl AES-də hərbi xidmətlə əlaqədar əlilliyi olan şəxslər və b.) təqdim olunub. Bu barədə 20 aprel tarixində Report məlumat verib.
Bu məqsədlə Suraxanı rayonunun Hövsan qəsəbəsindəki MİDA-nın Hövsan Yaşayış Kompleksində evlərin təqdim olunması mərasimi keçirilib.
Mərasimdə Əmək və əhalinin sosial müdafiəsi nazirinin müavini Vüsal Nəsirli iştirak edib.
Qeyd olunub ki, Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə Ordumuzun möhtəşəm Zəfər əldə etdiyi 44 günlük Vətən müharibəsindən sonra dövlət başçısının göstərişi ilə şəhid ailələri və müharibə iştirakçıları ilə bağlı icra olunan sosial dəstək paketi çərçivəsində ötən dövrdə 124 min şəxsə 281 min xidmət göstərilib.
Bu gün təqdim olunan mənzil və fərdi evlər də daxil olmaqla 44 günlük Vətən müharibəsindən sonra şəhid ailələri və müharibə ilə əlaqədar əlilliyi olan şəxslərə 4 660, bu il üzrə 160, ümumilikdə ötən dövrdə isə 13 460 mənzil və fərdi ev verilib. Dövlət başçısının tapşırığına uyğun olaraq, 2023-cü ildə də ən azı 1 500 mənzil və fərdi ev bu kateqoriyadan olan vətəndaşlara veriləcək.
[gallery link="file" size="full" ids="113217,113216,113215"]
