Günlərdir sosial şəbəkələrdə tanınmış Azərbaycan yazıçısı Əlisa Nicatın maddi durumu ilə bağlı müzakirələr gedir. Bu barədə İnsanoid BakuPlus.az-a istinadən bu gün, 2 dekabr tarixində xəbər verir.
“Qanun” Nəşrlər Evinin direktoru Şahbaz Xuduoğlu Facebook səhifəsində: “Əlisa Nicata ustalarla birlikdə baş çəkdim. Evə istilik sistemi lazımdır. Bu məqsədlə kombi və radiatorlar alınmalıdır. Evin ümumi vəziyyəti acınacaqlıdır, amma qışı yola vermək üçün istilik sistemi vacibdir. Bu gün ustalar lazımi avadanlıqları alacaqlar və sabahdan işə başlayacaqlar. Yardım etmək istəyən Əlisa Nicatın kartına pul keçirə bilər”- deyə, paylaşım edib.
Həmin gün şair Mikayıl Bozalqanlı Facebook hesabında bildirib ki, Əlisa Nicatın mənzili istilik sistemi ilə təmin edilib. Onun sözlərinə görə, problem Bakı Alman Dili Mərkəzinin maliyyə yardımı ilə aradan qaldırılıb, hər ay üçün 70 manat əvvəlcədən ödənilib.
Sosial şəbəkələrdə ictimai qınağa tuş gələn Yazıçılar Birliyinin mətbuat xidmətinin rəhbəri Xəyal Rza məsələyə fikir bildirib: “İndiyədək Əlisa Nicat birlikdən Prezident təqaüdü almayıb. Özü də müraciət edə bilərdi, amma etmədi. Lakin maddi vəziyyəti nəzərə alınaraq, adı hallanacaq və gələn il Prezident təqaüdünü ala biləcək”.
Çingiz Abdullayev isə bildirib ki: “Anar 84 yaşında gedib bir-bir evləri gəzməlidir? Kim müraciət edirsə, kömək etməyə çalışırıq. Ümumiyyətlə, pul işlərinə baxmırıq. Azərbaycan Yazıçılar Birliyinin özünün təqaüdü bir-iki aylıq olur, amma biz Əlisa Nicata 1 illik məbləğ vermək istəyirik. Qərar qəbul olunub. Kömək edəcəyik. Yoxlaya bilərsiniz”.
Bəs görəsən, Yazıçılar Birliyinin rəhbərliyinin seçkilərin keçirilməsinə 203 min manat xərcləməyə gücü çatan Birlik bundan sonra 100-dən çox ədəbi əsərin müəllifi olan 86 yaşlı yazıçıya lazımi diqqəti ayıracaqmı?
