“TEKNOFEST Azərbaycan” festivalı çərçivəsində keçirilən texnologiya müsabiqələrinin ilk mərhələsinin nəticələri məlum olub. Bu haqda martın 25-də Rəqəmsal İnkişaf və Nəqliyyat Nazirliyi tərəfindən məlumat verilib.
Açıqlanan nəticələrə əsasən, orijinallığı ilə seçilən və kommersiyalaşdırıla bilən 220 layihə II mərhələyə vəsiqə qazanıb.
Müsabiqələrdə iştirak etmək üçün 1000 komanda, ümumilikdə isə 5 min məktəbli, tələbə və fərdi sahibkar qeydiyyatdan keçmişdir. Layihələr münsiflər heyəti tərəfindən 100 ballıq şkala ilə qiymətləndirilib.
“TEKNOFEST” Aerokosmik və Texnologiya Festivalı cari ilin 26–29 may tarixlərində Bakıda keçiriləcək. Festivalın keçirilməsində əsas məqsəd aviasiya, kosmik sənaye, rəqəmsal iqtisadiyyat və ətraf mühitin qorunması kimi sahələrin gənclər arasında təbliği, bu sahələrdə sahibkarlığın təşviq edilməsi, eləcə də milli texnologiyaların geniş ictimaiyyətə təqdim olunmasıdır.
