Yanvarın 27-də Azərbaycanın İrandakı səfirliyində törədilən terror aktı zamanı yeni təfərrüat məlum olub. Bu barədə 6 fevral tarixində Report məlumat verib.
Həmin vaxt səfirliyin mühafizə xidmətinin əməkdaşı Vasif Tağıyev terrorçu tərəfindən çiynindən və çənəsindən güllələnib.
Belə ki, V.Tağıyev terrorçunun əlindən avtomatı almağa çalışıb. Bu zaman terrorçu avtomatdan atəş açmağa başlayıb. Güllələrdən biri səfirliyin döşəməsinə dəyib. Daha sonra onun açdığı digər bir atəş Vasif Tağıyevin çiynindən dəyib. O, terrorçunu binadan çıxarmağa cəhd edib. Həmin an V.Tağıyev terrorçunun avtomatının darağını çıxarmağa nail ola bilib. Ancaq avtomatın içərisində bir güllə qalıb. Terrorçu avtomatdan növbəti dəfə də atəş açıb. Avtomatın içərisində olan sonuncu güllə də tavana dəyib. Bundan sonra isə terrorçu əlini cibinə ataraq tapançasını çıxarıb və dərhal atəş açıb. Atəş nəticəsində güllə Vasifin çənəsindən girərək üzündən çıxıb.
