“Wizz Air” hava yolları Bakıdan Hindistan, Pakistan, Yaxın Şərqə və almandilli ölkələrə uçuşlar həyata keçirə bilər. Bu barədə İnsanoid Dövlət Turizm Agentliyinə istinadən bu gün, 14 yanvar tarixində xəbər verir.
Dövlət Turizm Agentliyinin sədri Fuad Nağıyev Macarıstanın ölkəmizdəki fövqəladə və səlahiyyətli səfiri Tamaş Yojef Tormanla görüşüb.
Görüşdə turizm şirkətləri, media nümayəndələri və influenserlərin qarşılıqlı səfərlərinin təşkili, bu istiqamət üzrə hər iki ölkənin mədəniyyətinin tanıtımına həsr olunan “Macarıstan və Azərbaycan günləri”nin keçirilməsi və qarşılıqlı təbliğat üçün birgə fəaliyyət planının hazırlanması haqqında fikir mübadiləsi aparılıb.
Səfir Tamaş Yojef Torman Azərbaycanla Macarıstan arasında birbaşa hava uçuşlarının sayının artırılması mövzusunda yanvarın 12-də Azərbaycan Turizm Bürosunun Baş icraçı direktoru Florian Zenqstşmidlə “Wizz Air” aviaşirkətinin icraçı vitse-prezidenti Ovein Cons arasında keçirilən görüş haqqında danışıb.
Qeyd edilən görüşdə Florian Zenqstşmid “Wizz Air” hava şirkətinin Əbu-Dabi – Bakı marşrutunun effektiv fəaliyyəti və BƏƏ-dən turizm axınına töhfəsi, ənənəvi bazarlarla yanaşı, son illərdə Yaxın Şərq, Pakistan, Hindistan bazarlarının Azərbaycan üçün əhəmiyyəti, həmçinin Avropada Polşa və almandilli ölkələr üzrə aparılan marketinq fəaliyyəti, Yaponiya və Koreya ilə bu istiqamətdə əlaqələrin intensivləşdirildiyini qeyd edib. O, “Wizz Air”in Bakıya hədəf ölkələrdən uçuşlar həyata keçirməsinin turist sayının artmasına təkan verəcəyinə əminliyini ifadə edib.
Öz növbəsində “Wizz Air” aviaşirkətinin icraçı vitse-prezidenti Ovein Cons təmsil etdiyi ultra-loukoster şirkətin daha çox insanın səyahət etməsini hədəflədiyini, Əbu-Dabi – Bakı reysinin əksər hallarda 100%, Budapeşt-Bakı reysinin isə 70% doluluq göstərdiyini bildirib.
Ovein Cons gələcəkdə Azərbaycanın regionlarında yerləşən hava limanlarına da uçuşların həyata keçirilməsində maraqlı olduqlarını diqqətə çatdırıb.
[caption id="attachment_101480" align="alignnone" width="640"]
Foto Dövlət Turizm Agentliyinin rəsmi saytı[/caption]
