Bu ilin yanvar-mart aylarında Azərbaycana dünyanın 157 ölkəsindən 2022-ci ilin müvafiq dövrü ilə müqayisədə 49,8% çox əcnəbi və vətəndaşlığı olmayan şəxs gəlib. Bu barədə 20 aprel tarixində Dövlət Statistika Komitəsi məlumat yayıb.
Gələnlərin 32,3%-i Rusiya Federasiyası, 21,5%-i Türkiyə, 9,1%-i İran İslam Respublikasının vətəndaşları olub. Gələnlərin 76,9%-ni kişilər, 23,1%-ni qadınlar təşkil edib.
2022-ci ilin yanvar-mart ayları ilə müqayisədə MDB ölkələrindən gələnlərin sayı 1,8 dəfə artaraq 151,4 min nəfər, Avropa İttifaqına üzv ölkələrdən gələnlərin sayı 40,1% artaraq 15,2 min nəfər, Körfəz ölkələrindən gələnlərin sayı 1,5% artaraq 59,1 min nəfər olub.
Azərbaycana gələn əcnəbilər və vətəndaşlığı olmayan şəxslərin 63,2%-i hava, 35,3%-i dəmir yolu və avtomobil, 1,5 %-i isə dəniz nəqliyyatından istifadə edib.
