Ukraynalı pilot Kravets Leonid Markoviç uzun sürən xəstəlikdən sonra aprelin 3-də dünyasını dəyişib. Bu haqda Ukrayna Azərbaycanlıları Birləşmiş Diasporunun sədri Hikmət Cavadov xəbər yayıb.
Leonid Kravets Xocalı soyqırımı haqqında rəsmi şəkildə Bakıya ilk xəbər verən və Azərbaycanın Milli Qəhrəmanı Çingiz Mustafayevi və hərbçiləri soyqırım ərazisinə aparan ilk pilot olub.
O, 1989-cu ildə Uzaq Şərqdən Azərbaycana köçürülüb, daha sonra isə Gəncədə hərbi xidmətdə olub və orada yaşayıb.
26 fevral 1992-ci ildə Leonid səhər Xankəndinə qayıdarkən gördüklərindən bəhs edib: “Sanki içimdən bir səs burada nəsə baş verdiyini pıçıldadı və mən enmək qərarına gəldim. İnanmaq olmurdu ki, haradasa 700 km-lik məsafədə insan meyitlərindən ibarət bir zolaq var. 150-200 metrlik yüksəkliyə enərək hələ sağ olan insanları qətlə yetirən şəxsləri gördük. Bu insanlar hələ sağ idilər. Mən buna şahidlik edə bilərəm. Hərbi formada, avtomatlı, saqqallı kişilər gəzərək həmin meyitləri çevirirdilər”. Leonid Kravets dərhal hərbi hissə komandirinə məlumat verdi.
İki gün sonra isə pilot Ağdamdan Azərbaycan və Rusiya telekanallarını çəkiliş üçün Xocalıya apardı. Həmin çəkiliş qrupunda Çingiz Mustafayev də var idi.
2016-cı ildə Leonid Kravets Prezident İlham Əliyev tərəfindən “Tərəqqi” medalı ilə təltif edilib.
