Zəngilanda İşğal və Zəfər muzeyləri kompleksinin təməlqoyma mərasimi baş tutub. Bu haqda mayın 26-da dövlət başçısının mətbuat xidməti məlumat yayıb.
İşğal Muzeyində Zəngilan şəhərində ətraf mühitə, bioloji müxtəlifliyə, meşələrə, yeraltı və yerüstü təbii ehtiyatlara ziyan vurmaq məqsədilə törədilən ekoloji terror aktları barədə məlumatlar diqqətə çatdırılacaq.
Zəngilan Zəfər Muzeyi Azərbaycan xalqının və ordusunun Vətən müharibəsi zamanı nümayiş etdirdiyi əzmkarlıq, rəşadət və peşəkarlığı əbədiləşdirən kompleks olacaq. Zəfər Muzeyinin binasının çinar meşəsini xatırladacaq fasadı dünyada sahəsinə görə ikinci ən böyük təbii çinar meşəsi olan Zəngilan meşələrinə həsr olunacaq. Burada 80 tamaşaçı yeri olan 4D kinoteatr da yaradılacaq.
Həmçinin tarixi faktların yaradıcı üsulla əks etdirilməsi üçün Zəngilanda dünyanın müxtəlif ölkələrindən cəlb olunacaq rəssamlar dağıntılar üzərində fərqli divar rəsmləri (“Street art”) yaradacaqlar.
Qeyd edək ki, rayonda ötən ilin aprel ayında təməli qoyulan Zəngilan məscidində də tikinti işləri davam edir.
[gallery link="file" columns="1" size="full" ids="50358"]
