Sentyabrın 15-dən etibarən "Azərbaycan Dəmir Yolları" QSC (ADY) tərəfindən Xırdalan–Bakı istiqamətində səfər müddəti 45 dəqiqədən 35 dəqiqəyə endiriləcək.
İnsanoid.com xəbər verir ki, körpünün bərpası tam başa çatdıqdan sonra isə əks istiqamətdə (Bakı–Xırdalan) müddət əvvəlki kimi 26 dəqiqə təşkil edəcək və Xırdalan–Sumqayıt xətti üzrə sərnişin daşımaları bərpa olunacaq.
Yeni qrafikə əsasən, Bakı–Xırdalan–Bakı marşrutu üzrə reyslərin ümumi sayı 26-dan 32-yə çatdırılıb. Xırdalan istiqamətində səhər saatlarında əlavə 2 reys, Bakı–Xırdalan istiqamətində isə saat 20:30-a yeni reys təyin edilib.
Sərnişin axınının çevik idarə olunması üçün Bakı Dəmiryol Vağzalında əlavə 11 turniketin quraşdırıldığı yeni zal istifadəyə verilib və turniketlərin ümumi sayı 46-ya çatdırılıb. Həmçinin "Visa" ilə yanaşı, "Mastercard" kartları vasitəsilə də NFC dəstəyi təmin edilib, müxtəlif stansiyalarda bank kartı ilə keçid üçün 58 əlavə validator quraşdırılıb.
