Yeni aşkarlanan təhlükəsizlik boşluqları hakerlərə parol bilmədən saytlara müdaxilə etmək imkanı yarada bilər
Azərbaycanda veb-sayt sahiblərinə ciddi kibertəhlükəsizlik xəbərdarlığı edilib.
İnsanoid.com xəbər verir ki, Rəqəmsal İnkişaf və Nəqliyyat Nazirliyinin tabeliyində fəaliyyət göstərən Milli Kibertəhlükəsizlik Agentliyi (MKA) dünyada milyonlarla saytın hazırlanmasında istifadə olunan PHP proqramlaşdırma dilində iki kritik təhlükəsizlik boşluğunun aşkarlandığını açıqlayıb.
Söhbət "PHP2Shell" adlandırılan təhlükəsizlik problemindən gedir. Bu boşluqların təhlükəliliyi 10 ballıq şkala üzrə 9,2 balla qiymətləndirilib.
**Ən ciddi məqam odur ki, hakerlər müəyyən şərtlər daxilində saytın istifadəçi adını və parolunu bilmədən də onun işlədiyi serverə müdaxilə edə bilərlər.**
Belə hücumlar nəticəsində saytdakı məlumatlar, o cümlədən istifadəçilərin şəxsi məlumatları oğurlana, saytın məzmunu dəyişdirilə və serverə zərərli proqramlar yerləşdirilə bilər.
Problem xüsusilə "WordPress", "Joomla" və "Drupal" kimi məşhur sistemlər əsasında fəaliyyət göstərən, PHP-nin təhlükəsizlik yeniləmələri quraşdırılmamış saytlara da təhlükə yaradır. Buraya xəbər saytları, internet mağazaları və müxtəlif onlayn xidmətlər daxil ola bilər.
Agentlik sayt sahiblərini və hostinq şirkətlərini təcili təhlükəsizlik tədbirləri görməyə çağırıb.
Tövsiyə olunur ki, PHP proqramının istifadə olunan versiyası yoxlanılsın və 8.5.12, 8.4.27, 8.3.36 və ya 8.2.35 kimi təhlükəsizlik düzəlişləri olan versiyalara yenilənsin. Həmçinin serverlərdə şübhəli fəaliyyətin olub-olmadığı araşdırılmalıdır.
Saytını hostinq şirkətinin serverində yerləşdirən şəxslərə isə həmin şirkətlə əlaqə saxlayaraq təhlükəsizlik yeniləmələrinin həyata keçirildiyini dəqiqləşdirmək tövsiyə edilir.
MKA bildirir ki, mümkün kiberhücum halları barədə dərhal Milli CERT-ə məlumat verilməlidir.
Qeyd edək ki, təhlükəsizlik boşluğunun aşkarlanması bütün PHP əsaslı saytların artıq sındırıldığı anlamına gəlmir. Lakin lazımi yeniləmələr edilmədiyi halda həmin saytlar haker hücumlarına qarşı həssas ola bilər.
