Yeraltı anbarlarda 104 kiloqram narkotik maddə gizlədən şəxslər saxlanılıb. Bu barədə martın 17-də Daxili İşlər Nazirliyi məlumat yayıb.
Son 15 gündə narkotiklərin qanunsuz dövriyyəsi ilə məşğul olan 38 nəfər saxlanılıb. Onlardan ümumilikdə 104 kiloqram narkotik vasitə və psixotrop maddə, 2441 psixotrop tərkibli həb, ov tüfəngi və patronlar aşkar edilərək götürülüb.
Bakının Yasamal, eyni zamanda, Abşeron, Qobustan və Bərdə rayonlarında keçirilən əməliyyat zamanı 5 nəfər saxlanılıb. Onlar mütəşəkkil dəstə yaradıb xaricdən göndərilən külli miqdarda narkotik vasitəni əldə ediblər. Həmin şəxslər yaşadıqları evlərdə torpağın altında anbarlar yaradaraq narkotikləri orada gizlədib və satmaq məqsədi ilə paytaxt ərazisinə gətirməyə çalışıblar.
Paytaxtın digər rayonlarında, eləcə də Abşeron, Sabirabad və Qəbələdə keçirilən əməliyyatlar nəticəsində 17 nəfər tutulub. Gəncə, Lənkəran şəhərləri, həmçinin Masallı, Astara, Yevlax və Cəlilabad rayonlarında isə daha 16 nəfər saxlanılıb.
Faklarla bağlı müvafiq maddələrlə cinayət işləri başlanılıb. Saxlanılan şəxslər barəsində həbs qətimkan tədbirləri seçilib.
