Dələduzluq, mənimsəmə və rüşvətdə ittiham olunan təhsil işçiləri həbs ediliblər. Bu barədə aprelin 16-da Qafqazinfo məlumat yayıb.
Mədəniyyət və İncəsənət Universitetinin nəzdində Humanitar Kollecin şöbə müdiri Gülnarə İsgəndərova, Tibb Universitetinin əməkdaşları Kəmalə Alıyeva və Elmira Babayevanın cinayət işi üzrə məhkəmə prosesi yekunlaşıb.
Bakı Ağır Cinayətlər Məhkəməsinin hökmü ilə G. İsgəndərova 6 il 6 ay,
K. Alıyeva və E. Babayeva isə 6 il müddətinə azadlıqdan məhrum ediliblər.
G. İsgəndərova 2017-ci ildən etibarən vəzifəsindən istifadə edərək və ATU-nun əməkdaşları ilə əlbir olaraq ümumilikdə 21 nəfərdən Tibb Universitetində müxtəlif vəzifələrə düzəltmək adı ilə 126 500 manat alıb. Bundan başqa, o, universitetin adından saxta əmrlər hazırlayıb.
