Ağsuda beş il əvvəl törədilərək bağlı qalmış cinayətin üstü açılıb. Bu barədə martın 18-də Baş Prokurorluğun Mətbuat Xidmətindən məlumat verilib.
Ağsu şəhər sakini, 1999-cu il təvəllüdlü Qəhrəmanova Ayşən 27 yanvar 2017-ci il tarixdə itkin düşmüşdü. Təqsirləndirilən şəxsin müəyyən edilməməsi əsası ilə cinayət işi 20 dekabr 2019-cu il tarixdə dayandırılıb.
7 mart 2022-ci il tarixdə iş üzrə icraat təzələndi və əməliyyat axtarış tədbirləri həyata keçirildi. Müəyyən olundu ki, 2017-ci ildə yanvarın 28-də 1991-ci il təvəllüdlü Asif Manafov yaxın münasibətlərdə olduğu Ayşən Qəhrəmanova ilə aralarında yaranan mübahisə zamanı onu bıçaqlayaraq öldürüb. O, meyiti əvvəlcə Qaraqaşlı kənd qəbiristanlığında gizlədib, sonra isə meyiti oradan götürüb Kürdəmir rayonu ərazisində Şirvan kanalının yaxınlığında basdırıb.
16 mart 2022-ci il tarixdə meyitin basdırıldığı yerdən insan skelet hissələri, geyimin parçaları aşkar edilərək götürülüb. 17 mart 2022-ci il tarixdə Asif Manafov şübhəli şəxs qismində tutulub və törətdiyi əməli etiraf edib.
