Ağdamda dörd minadan ibarət tələ-mina aşkarlanıb. Bu barədə 3 noyabr tarixində Azərbaycan Minatəmizləmə Agentliyi məlumat verib.
Ağdam rayonunun Orta Qərvənd kəndi ərazisində 1 ədəd tank əleyhinə TM-62P3 minasının üzərinə 1 ədəd piyada əleyhinə PMN-2 minasının, eləcə də 3 ədəd üst-üstə yerləşdirilən tank əleyhinə TM-62P3 minasının üzərinə 1 ədəd piyada əleyhinə PMN-2 minasının yerləşdirilməsi faktları aşkar edilib.
“Tərkibində 7 kq partlayıcı maddə olan tank əleyhinə mina texnikanın sıradan çıxarılması üçün nəzərdə tutulub. Aşkar olunan tank və piyada əleyhinə minalardan ibarət üst-üstə qoyulan tələ-minaların partlayışı nəticəsində nəinki insanın sağ qalma ehtimalı, hətta texnikanın hər hansı bir hissəsinin yararlı halda qalması sıfıra bərabərdir”, - məlumatda bildirilib.
Qeyd edək ki, noyabrın 2-si Cəbrayıl rayonunun Mehdili kəndində 1972-ci il təvəllüdlü Əhmədov İlqar Heybət oğlu minanın partlaması nəticəsində xəsarət alıb.
