Abşeronda əri tərəfindən qətlə yetirilən Hüseynli Leylanın tələbə olduğu məlum olub. Bu barədə 22 iyun tarixində Report BDU-nun Mətbuat Xidmətinə istinadən məlumat verib.
"Bakı Dövlət Universitetinin (BDU) Biologiya fakültəsinin III kurs tələbəsi Leyla Hüseynli və körpəsi qətlə yetirilib. BDU kollektivi bu ağır cinayətdən kədərləndiyini bildirir, tələbəmizə rəhmət diləyir, cinayətkarın layiq olduğu cəzanı alacağına inanır. Leyla Hüseynli intizamlı, fəal tələbə kimi tanınıb, yüksək akademik göstəriciləri olub", - məlumatda deyilir.
Qeyd edək ki, iyunun 20-si saat 19 radələrində Abşeron rayonunun Qobu qəsəbəsində 2003-cü il təvəllüdlü Hüseynli Leyla Əlişan qızının və 8 aylıq körpəsinin ölməsi barədə rayon prokurorluğuna məlumat daxil olub.
Abşeron rayon prokurorluğundan verilən məlumata görə, aparılmış araşdırmalarla 1993-cü il təvəllüdlü Hüseynli Fərid Firdövsü oğlunun arvadı Leyla Hüseynliyə və övladına kəsici-deşici alətlə xəsarət yetirərək qəsdən öldürdükdən sonra özünə xəsarət yetirməsinə əsaslı şübhələr müəyyən edilib.
Faktla bağlı cinayət işi başlanıb.
